Sirr deyil ki, Azərbaycan torpaqlarının Ermənistanın işğalından qurtarılması üçün apardığımız 44 günlük şanlı hərbi əməliyyatlar zamanı Almaniya birmənalı şəkildə Azərbaycanın ədalətli işinə kölgə salmağa çalışır, açıq və ya gizli şəkildə Ermənistanı dəstəkləyirdi. Amma müharibə ortalama 5 ay əvvəl Azərbaycan ordusunun qələbəsi ilə başa çatıb, Ermənistan təslim aktını imzalayıb. Artıq işğaldan azad edilmiş torpaqlarda bərpa-quruculuq işlərinə start verilib. Buna baxmayaraq, Almaniya həm dövlət səviyyəsində, həm də mətbuat müstəvisində ölkəmizə qarşı düşmənçilik siyasəti yürüdür. Səbəb nədir, Almaniya dövlətinin Azərbaycanla haqsız və heç bir əsası olmayan düşmənçiliyinin səbəbi nədir, nə edək ki, əslində tarixdə iki dəfə dünyanı qanlı müharibələrə sürükləyərək, on milyonlarla insanın ölümünə bais olan, bu gün isə özünü demokratik, ədalətli hesab edən alman ictimaiyyəti doğru yola gəlsin?

Bu mövzuda Almaniyada yayımlanan Medya.Berlin xəbər saytının redaktoru Mustafa Eksi ilə söhbətləşdik. Gəlin müsahibəni birlikdə nəzərdən keçirək:

- Almaniyadakı erməni diasporu, bu dövlətin Azərbaycanla mövcud əlaqələrində çox ciddi rol oynamağa başlayıb. Almaniya öz tarixindəki bənzərlikləri 1915-ci il olayları müstəvisində istifadə edərək erməni diasporunu yönləndirməyə çalışmaqdadır. Əslində, Almaniya Azərbaycan və Türkiyənin “Bir millət, iki dövlət” olduğunu yaxşı bilir. Fikrimcə, Almaniya düşünür ki, bu iki ölkənin ortaq hərəkət etməsi onun maraqlarını zədələyəcək. Ona görə də özünü narahat hiss edir. Xüsusilə də, son illər ərzində yürütdüyü siyasətini Yaşıllar Partiyasının Türkiyə əsilli millət vəkili üzərindən içra etməsi isə oyunun başqa bir üzüdür.

- Belə deyək, məsələn, hansısa ölkə Almaniyanın bir qarış torpağını işğal etsəydi, doğrudanmı Berlin müharibəni deyil, eynən bizim kimi, 30 il boş-boşuna danışıqlar yolunu tutardı? Necə ki, Ermənistan 30 il idi Qarabağda və digər işğal etdiyi torpaqlarda möhkəmlənərək Bakını danışıqlar prosesində süründürürdü…

- Bir söz deyim: Yaşıllar Partiyasının antitürk siyasi mövqeyi hər kəsə bəllidir. Elə 2016-cı ildə qondarma erməni soyqırımını tanımaq haqda qanunun Almaniya parlamentində qəbul edilməsi də məhz Yaşıllar Partiyasının səyləri nəticəsində mümkün olub. Yadınızdadırsa, bu qanunun qəbulunda Türkiyə əsilli almaniyalı millət vəkili Cem Özdəmir xüsusi canfəşanlıq göstərirdi. Nəticə olaraq bu səylərin qarşılığında isə Ermənistan səfirliyində düzənlənən törəndə Özdəmirə “Dövlət Nişanı” təqdim edildi. Məhz həmin məclisdə Almaniya Erməni Cəmiyyətindən Raffi Kantiyana da “Ləyaqət Nişanı” verildi. Ermənilər alman cəmiyyətinin hörmətini qazanmaq üçün çox ciddi səylər göstərirlər. Erməni diasporunun 2016-cı ildə Almaniyada, xüsusilə də kilsələrdə həyata keçirdiyi bir sıra işləri ilə xalqın və alman mediasının mövqeyini özünə tərəf dəyişdirə bilib.

- Baxın, müharibə ötən il noyabrın 10-da başa çatdı, Ermənistan təslim aktını imzaladı və təbii ki, torpaqlarımız azad olundu. Almaniya müharibə qurtarandan 5 ay sonra niyə Azərbaycana qarşı təkrar düşmənçilik sərgiləyir, Azərbaycana nə verib ki, ala bilmir?

- Qərbin baş verənlərə münasibətinin formalaşmasında haqqın deyil, gücün təsiri mühüm rol oynayır. Özü də gücü öz qaydaları çərçivəsində tətbiq edirlər. Son hadisələr zamanı - Azərbaycan ordusu Qarabağı 30 illik işğaldan azad edərkən var olan gücə qarşı çox da səs çıxara bilmədilər. Burada Türkiyə və Azərbaycanın ortaq mövqe sərgiləməsinin nə qədər vacib rol oynadığı görürük. Amma həqiqət bu idi ki, alman siyasi arenası hər nə qədər erməni diasporuna Almaniya torpaqlarında təbliğat və təşviqat aparmasına imkan versə də, əslində beynəlxalq arenada Qarabağın Ermənistan tərəfindən işğal edildiyini bilirdi. Almaniya əyalət sistemi çərçivəsində idarə olunmaqdadır. Əyalətlərin siyasəti federal hakimiyyətin siyasəti ilə kəsişməyə bilər. Məsələn, federal parlamentdə müzakirələr əsasən Türkiyənin, bir çox hallarda isə Azərbaycanın əleyhinə olur. Hansı ki, bu ölkədəki erməni diasporuna bütün vaxtlarda hər cür dəstək verilir.

- Ədalətli dediyimiz alman mediasına nə oldu, onlar niyə birmənalı şəkildə Azərbaycana qarşı şər-böhtan kampaniyası aparır? Siz də medianı təmsil edirsiniz, bilməmiş olmazsınız, alman jurnalistlərin dərdi nədir?

- “Almaniyada ədalətli media” sözünüzə gülümsəyərək cavab vermək istərdim. Almaniya mediası “dərin Almaniya”nın və okeanın o tərəfindən verilən təlimatlarla hərəkət edir. Sizə bu məsələləri açıqlayan “Satın alınan jurnalistlər” adlı kitabı vərəqləməyi məsləhət görərdim. Oxusanız görəcəksiniz ki, alman jurnalistlər kimlər və hansı dairələr tərəfindən idarə edilir. Təəssüf ki, kitabın müəllifi Udo Ulfkotte 54 yaşındaykən müəmmalı şəkildə ürək tutmasından dünyasını dəyişib.

- Yeri gəlmişkən, alman mediası anti-Azərbaycan mövqeyi sərgilədiyi bir zamanda, Medya. Berlin olaraq siz nə etdiniz, sizin və həqiqətin tərəfdarı olan digər dostlarımızın köməyi ilə alman mediasında, məsələn, son bir ayda Azərbaycanla bağlı nələr yazıldı? Ən azından həqiqəti alman ictimaiyyətinə çatdırmaq üçün nələrsə edə biləcəyinizi düşünürəm...

- Medya.Berlin olaraq, hər zaman Qarabağın Ermənistan ordusunun işğalından qurtarılma prosesini yaxından izləmişik. İctimai rəyi formalaşdırmaq üçün Berlində yaşayan azərbaycanlılarla müsahibələr etmişik, burada Azərbaycan vətəndaşları tərəfindən keçirilən bütün mitinqləri işıqlandırmışıq və sair. Məsələn, maraq üçün bir neçə yazımızın linkini də sizə təqdim edirəm. Biləsiniz ki, biz hər zaman Azərbaycan xalqının yanındayıq. http://medya.berlin/berlin-buyukelciliginden-bild-gazetesinde-yayinlanan-iddialara-yanit, http://medya.berlin/daglik-karabag-ermenistan-icin-arazi-bizim-icin-vatan, http://medya.berlin/berlinde-azerbaycana-destek-mitingiərbaycan oxucularına, http://medya.berlin/cavusoglu-ermenistan-isgal-ettigi-topraklardan-cikmalidir və sair.

- Linklərdən birincisinə baxdım, Türkiyə səfiri Qarabağ həqiqətlərindən bəhs etmiş, Ermənistanın sayıqlamalarına cavab verib. Almaniyada Azərbaycanın da səfirliyi var, üstəlik diaspor təşkilatlarımız da mövcuddur. Daha əvvəllərə getməyək, son iki ayda Almaniyada yaranan anti-Azərbaycan atmosferini dağıtmaq üçün səfirliyimiz və ya diaspor təşkilatlarımız media nümayəndələri ilə görüşdümü, mətbuatda hər hansı məqalələr yayınladımı?

- Bu suala üzülərək cavab vermək istəyirəm: təəssüf ki, Azərbaycanın Berlindəki səfirliyi burada fəaliyyət göstərən türk media mənsubları ilə hər hansı şəkildə bir araya gəldiyinin şahidi olmamışam. Hansı ki, Azərbaycan səfirliyinin Almaniyadakı türk media quruluşlarının ictimaiyyətə təsir imkanlarından maksimum faydalanmasının zəruri olduğunu düşünürəm.

- Uzun illərin jurnalisti olaraq necə düşünürsünüz, Almaniya mediasını haqqın yanında olmağa, həqiqətləri işıqlandırmağa dəvət etmək, Azərbaycana iftira atmaqdan, haqq işimizə kölgə salmaqdan çəkindirmək və ermənilərin əslində necə irticaçı olduğuna inandırmaq üçün nələri etməliyik?

- Məncə, əvvəla Azərbaycan səfirliyinin Almaniyadakı türk mediasını daha çox məlumatlandırması lazımdır. Almaniya kimi böyük və Avropanın lokomotivi olan bir ölkədə Azəbaycan haqqında tanıtım və təbliğat işləri artırılmalıdır. Türkiyə və Azərbaycan ortaq fəaliyyətlərində türk mediası birmənalı şəkildə iştirak etməlidir. Xüsusilə də Xaricdə Yaşayan Türklər Başqanlığında Azərbaycanla əlaqəli layihələr ortaq fəaliyyətlə dəstəklənməlidir. Təbii, pandemiya şəraitində bunun bir az çətin olduğu məlumdur, amma hər halda səylər davam etdirilməlidir. Mümkün olarsa, Almaniyadakı türk mətbuat nümayəndələrinin Azərbaycana, azərbaycanlı jurnalistlərin isə Almaniyaya səfəri həyata keçirilməlidir. Ortaq media fəaliyyətinə xüsusilə gənc nəsil müsbət yanaşacaq. Almaniyadakı türk nəslin bütün milli məsələlərdə davamlı olaraq aktiv tutulması məqsədilə medianın önəmi çox böyükdür.